“Udhëtarët” eksplorojnë të veçantat e rrethinave të Shkodrës

Me serinë e radhës të emisionit “Udhëtarët”, gazetarët Loneta Progni dhe Renaldo Salianji tregojnë për vendet më interesante të rrethinave të Shkodrës.

Pasi eksploruan qytetin e Shkodrës destinacionet e radhës janë Gajtani dhe Zogaj janë disa nga zonat më të veçanta, të cilat mund të qasen lehtësisht me biçikletë apo dhe makinë pasi nuk janë shumë larg qytetit.

• “Udhëtarët” nisin rrugëtimin e parë nga “djepi i kulturës”, Shkodra

“Udhëtarët” vizituan si fillim shpellën e Gajtanit, e cila ka qenë strehë për njerëzit e kohës së paleolitit. Udhërrëfyesi, profesori i gjeografisë, 73-vjeçari Aleks Dushi, tregoi edhe për zakonet e hershme të banorëve që mendohet se jetuan në të.

• “Udhëtarët” eksplorojnë shpellën e Gajtanit, vendbanim i hershëm i paleolitit

Rrugëtimi për në qytezën e Gajtanit është gjithashtu interesant pasi mban gjurmë të hershme të qeramikave apo punimeve prej balte, si dhe rrënojat e mureve të qytetit të vjetër ilir.

• Qyteza e Gajtanit, vendbanimi ilir që të kthen pas në kohë

Zogaj, një fshat i vogël buzë liqenit të Shkodrës, është gjithashtu një pikë tejet interesante për t’u vizituar në Shkodër. E njohur për peshkimin dhe punimet e tezgjahut “Udhëtarët” tregojnë edhe për disa prej traditave që i karakterizojnë banorët e saj.

Prodhimi i qilimave me modele të vjetra në tezgjah mbahet gjallë në Zogaj nga një grup grash të cilat i kanë trashëguar ato brez pas brezi. Motivet kombëtare, por edhe prej natyrës apo liqenit paraqiten në mënyrë fantastike në punimet e tyre.

• Zogaj, fshati turistik buzë Liqenit të Shkodrës që mban ende gjallë punimin në tezgjah

Ashtu si në qytetin e Shkodrës, edhe në rrethinat e saj oborret me lulebore apo livandë janë karakteristikë kryesore, ndërkohë që vozitjet në liqen dhe peshkimi janë gjithashtu pjesë e pandashme e përditshmërisë së banorëve.

Përmes një lundrimi me varkë “Udhëtarët” mundën të përcjellin pamje fantastike nga natyra e liqenit deri në kufirin me Malin e Zi.

• 3 destinacione interesante që duhen vizituar në rrethinat e Shkodrës