UEFA jep mesazh për luftën në finalen e Superkupës: Ndaloni vrasjet!

PSG është fituese e Superkupës së Evropës pasi mposhti në një finale dramatike Tottenhamin, e cila u vendos nëpërmjet 11 metërshave. Një ndeshje tejet e luftuar nga të dyja ekipet, por ajo çka mori një vëmendje të madhe përpara nisjes së saj është thirrja e bërë nga UEFA e cila dha një mesazh të qartë për luftërat që kanë prekur kontinentin e vjetër.

“Ndaloni vrasjen e fëmijëve. Ndaloni vrasjen e civilëve”, shkruhej në banerin e vendosur në fushë në momentin e prezantimit të ekipeve. Ky reagim vjen pak ditë pasi Salah u kthye në tone të ashpra ndaj qeverisë evropiane të futbollit në lidhje me vrasjen e futbollistit Suleiman al-Obeid.

Sa i përket ndeshjes, ajo nuk zhgënjeu, ku u dhurua një spektakël i jashtëzakonshëm, ku Tottenham kaloi i pari në avantazh me Miki Van de Ven. Me nisjen e pjesës së dytë Romero dyfishoi, por PSG nuk e kishte thënë fjalën e fundit. 2 lojtarë të ardhur nga stoli rikthyen ekuilibrat, Lee Kang-in dhe Goncalo Ramos. 2-2 koha e rregullt, teksa u ekzekutuan penalltitë, aty ku PSG triumfoi 4-3 dhe ngriti lart trofeun për herë të parë në histori.