Ukraina refuzon korridoret humanitare të Rusisë

Veprimet dhe propozimet e Rusisë për korridoret humanitare janë imorale.

Kështu deklaroi një zëdhënës i presidentit Ukrainas, pasi Kremlini propozoi evakuimin e civilëve përmes zonave të kontrolluara ose të sulmuara nga ushtria ruse.

Kievi i hodhi poshtë propozimet, pasi thuajse të gjitha akset çojnë drejt territorit armik.

 “Sot, nga ora 10 me kohën e Moskës, është shpallur një armëpushim dhe janë hapur 6 korridore humanitare: njëri nga Kievi në Gomel; dy nga Mariupoli në Zaporizhia dhe Rostov-on-Don; një nga Kharkivi në Belgorod; dhe dy nga Sami drejt Belgorodit dhe Poltavës,” – deklaroi Igor Konashenkov, zëdhënës i Ministrisë ruse të Mbrojtjes.

 “Ky është një opsion i papranueshëm. Njerëzit tanë nga qytetet Ivankiv, Dimer, VIoshorod dhe Kievi nuk do të shkojnë në Bjellorusi dhe më pas në Rusi,” – shtoi Iryna Vereshchuk, zëvendës kryeministre e Ukrainës

Ukraina thotë se Rusia dëshiron t’i përdorë vuajtjet e popullsisë për qëllime propagandistike dhe akuzon Moskën se ka bjokotuar sistematikisht të gjitha marrëveshjet për evakuimin e civilëve nga qytete si Mariupoli.

Nga ana e saj, Rusia thotë se propozimet kanë ardhur pasi iu kërkuan nga presidenti francez Emmanuel Macron, gjë që është hedhur poshtë nga pallati Elize.

LEXONI GJITHASHTU:

• Lufta në Ukrainë trondit bursat evropiane