I ftuar në emisionin Now me Erla Mëhillin, analisti Lorenc Vangjeli deklaroi se pas goditjeve të fundit nga SPAK, kryeministri Edi Rama është ai që ka më shumë arsye për shqetësim sesa opozita.

Sipas tij, tensioni brenda mazhorancës është rritur, pasi askush nuk e di se si do të vijojnë hetimet dhe nëse përpara zgjedhjeve të 11 majit do të ketë një tjetër goditje pas asaj ndaj kryebashkiakut Erion Veliaj.

“Nëse e analizojmë situatën, kush ka pasur më shumë kokëdhimbje nga drejtësia këto tre muaj? Normalisht, mazhoranca. Ky është një instrument që, edhe nëse fillimisht u pilotua për t’i dhënë Ramës një armë në dorë, sot i ka dalë jashtë kontrollit,” tha ai.

Sipas Vangjelit, frika më e madhe e kryeministrit është nëse SPAK do të ndërmarrë një tjetër hap para zgjedhjeve të 11 majit.

Ai theksoi se sistemi i drejtësisë, edhe nëse fillimisht ishte konceptuar si një instrument në duart e mazhorancës, tashmë është bërë i pavarur dhe nuk po kursen asnjë palë.

“Nëse Veliaj do të arrestohej më 12 maj, me shumë gjasë nuk do ta kishim këtë retorikë nga Rama. Ne si gazetarë kemi informacion, dhe kryeministri mund të gjykojë se në shënjestër mund të jetë një drejtues i lartë me një akuzë të bërë brenda llojit,” tha ai, duke nënvizuar se aktualisht situata është e paqëndrueshme edhe për mazhorancën.

“Prandaj, Edi Rama ka shumë kokëdhimbje,” përfundoi Vangjeli.

LEXONI GJITHASHTU:

• Balliu: Amerikanët nuk kanë ikur nga Shqipëria, po largohen ata që vranë opozitën
• Vangjeli: PD i quan të larta kërkesat e PL-së për vendet e sigurta