“Veliaj nuk paraqet rrezikshmëri”, avokati: Masa e GJKKO-së është e tepërt

I ftuar në Review në Euronews Albania, avokati Gentjan Romano e cilësoi masën ndaj kryetarit të Bashkisë së Tiranës, Erion Veliaj, si të ashpër dhe të bazuar më shumë në teori sesa në rrethana konkrete.

Sipas tij, prokuroria ka siguruar të dhëna që mund të sugjerojnë korrupsion dhe pastrim të produkteve të veprës penale, por vlerësimi i gjykatës duhej të ishte më i bazuar në prova konkrete.

“Nuk kemi të pandehur, por një person në hetim. Vendimi që merret në këtë fazë nuk është përfundimtar, por është një vlerësim i kushteve nëse Veliaj duhet të qëndrojë në burg ose të ndiqet në gjendje të lirë. Nëse i referohemi hetimeve në zhvillim, unë kam theksuar se Veliaj nuk paraqet rrezikshmërëi të lartë shoqërore. Gjykata ka konsideruar një qasje teorike mbi kushtet e parashikuara nga ligji, por de facto këto kushte nuk plotësohen, pasi edhe vetë prokuroria është ende në fazën e dyshimit për ekzistencën e një vepre penale,” tha Romano.

Sipas tij, Veliaj nuk paraqet asnjë lloj rrezikshmërëie që të justifikojë një masë të tillë.

“Për mendimin tim, mund të ishte vendosur një masë më e butë ose madje edhe hetimi pa asnjë masë sigurie. Duke marrë parasysh funksionin e tij si kryetar i Bashkisë së Tiranës dhe angazhimet e tij publike, ai nuk paraqet rrezikshmërëi. Si figurë publike dhe e emëruar, nuk i përket kategorisë së individëve që mund të konsiderohen të rrezikshëm, ndaj masa e dhënë është e tepruar,” shtoi avokati Romano.

LEXONI GJITHASHTU:

• Ish-prokurori Karanxha kritikon SPAK: Veliaj mund të hetohej në liri
• Reagon Veliaj: Djali im jetim me urdhër prokurori dhe vendim gjykate