Veriu i vendit po tkurret, shkak emigrimi dhe rënia e lindjeve

Shqiptarët po zgjedhin të sjellin në jetë më pak fëmijë. Nga viti në vit numri I bebeve që lindin po vjen në rënie të ndjeshme. 2023 u mbyll me 22,210 lindje, shifër kjo 10% më e ulët se viti 2022.

Ndërsa vendi po përballet me rënie të shpejtë të lindjeve, sidomos në vitet pas pandemisë, në veri të vendit fenomeni po intensifikohet më shumë.

Bazuar në të dhënat e institutit të statistikave, Kukësi është qarku I cili ka shënuar dhe  rënien më të madhe të lindshmërisë me 18.5%.

Në qarkun Verilindor vitin e shkuar lindën vetëm 667 bebe nga 819 që lindën në 2022.

Kjo ulje e lindjeve së bashku me emigrimin e brendshëm dhe të jashtëm të banorëve, po çon drejt zbrazjes së këtij qyteti.

Pas Kukësit, tkurrjen më të madhe të lindjeve e ka Lezha me rreth 16.3 % lindje më pak në vitin 2023. Në këtë qark lindën 1010 foshnja më 2023 nga 1208 vitin e mëparshëm, e ndjekur nga Dibra ku lindjet shënuan rënie me 14.4% dhe Shkodra me 13.7%.

Më rënie të lindjeve po përballet edhe kryeqyteti, i cili nga viti në vit ka shtesë gjithnjë e më të ultë të popullsisë. Vitin e kaluar në Tiranë linden 8144 foshnja më rënie vjetore 10.4%.

Në harkun kohorë të 10 viteve të fundit lindjet në shkallë kombëtare kanë shënuar rënie me 37%, ku normat më të larta i ka Berati dhe Kukësi me 52 dhe 50% secila.

Kjo ishte rënia më e fortë në 30 vitet e fundit duke tejkaluar edhe projeksionet më pesimiste për ecurinë e popullsisë së vendit .Të dhënat e INSTAT tregojnë se gjatë vitit 2022, norma e fertilitetit ra në 1.21 fëmijë për grua në moshë riprodhimi, nga 1.32 që ishte më 2021.  

LEXONI GJITHASHTU:

• Nga se nxiten vetëvrasjet? Vetëm në qarkun e Durrësit janë shënuar 40 raste në 2023
• I akuzuar për pastrim parash, GJKKO rrëzon kërkesën e Taçit për pushimin e çështjes