Vështirësitë e brigadës së pastruesve për një Shkodër të pastër

Kur në qytet bie nata dhe dritat shuhen, në rrugë, shfaqet brigada e pastruesve.

Pavarësisht kushteve atmosferike, në të ftohtë, në shi dhe në dëborë ata janë aty, për të pastruar atë që ne ndotim çdo ditë. Qotherja, ndonëse 63 vjeçe, çdo natë kujdeset që rrugët e qytetit të zbardhin të pastra.

“Që në kohën e Enver Hoxhës ka që punoj në pastrimin e qytetit”, u shpreh ajo.

Edhe Lumnijen që nga vitin 2005, çdo agim e kap me fshesë në dorë në trotuare e qytetit.

“Unë për natë punoj, më pas shkoj në shtëpi. Është e vështirë, por kemi rroba për të përballuar të ftohtin”, tha Lumnije Alushi.

Vështirësitë për to janë të shumta, ndërsa u shtohen dhe shoferët e papërgjegjshëm që shpesh herë u rrezikojnë dhe jetën.

Çdo fundvit të rinj të qytetit të Shkodrës, angazhohen që t’i qëndrojnë afër punëtorëve të natës. Çaj të ngrohtë, biskota dhe fruta, thjesht për t’u kujtuar që dikush mendon edhe për ta.