VIDEO/ Denoncimi i mësueses në Vlorë: Si u dhunova nga fqinji i prindërve

Një ngjarje e rëndë ka ndodhur në qytetin e Vlorë, ku një 42-vjeçare me inicialet E. L., mësuese, ka denoncuar se është dhunuar nga fqinji i prindërve të saj.

Ngjarja ndodhi pak orë më parë në zonën e Skelës. Sipas dëshmisë së saj, fillimisht është ofenduar verbalisht dhe më pas është sulmuar fizikisht, por ka arritur të shpëtojë dhe të kërkojë ndihmën e policisë.

E dhunuara tha se konflikti ndodhi pa asnjë shkak të mëparshëm dhe se autori është banor në të njëjtin pallat me prindërit e saj.

“Rreth orës 13:00–13:30, duke shkuar për në shtëpi, më del përpara një person i veshur me rroba të zeza dhe kapuç që i mbulonte pjesërisht fytyrën. Më shtrëngoi prej fyti dhe më shan pa asnjë arsye. Me këtë person nuk kam pasur kurrë konflikt. Menjëherë njoftova policinë dhe, e frikësuar, u drejtova në banesën e prindërve të mi. Por ai më ndoqi dhe më dhunoi sërish, duke më kapur fort nga fyti. Në përpjekje për t’u larguar, më qëlloi në dorë dhe më mori telefonin duke e thyer që të mos mund të telefonoja askënd”, ka rrëfyer E. L.