Vlerësimi psiko-social i mësuesve, ekspertët dhe mësuesit të ndarë në mendime

Ministria e Arsimit ka vendosur të bëjë vlerësime psiko-sociale, në mënyrë periodike te mësuesit, por vendim ky ka sjellë reagime kontroverse.

Ekspertja e Arsimit Valbona Nathanaili e cilëson vendimin e ministrisë “të ekzagjeruar”.

Në emisionin Mirmëngjes në Euronews Albania, ajo thotë se jo të gjithë mësuesit mund të jenë subjekt i një testi të tillë.

“Jo të gjithë mësuesit janë subjekt i një testi të tillë, vetëm sepse ka disa raste ku mësuesit kanë shkelur etikën”, tha Nathanaili.

Nathanaili shton se teste të tilla mund të jenë hartuar për popullatën e një vendi tjetër, por “nuk mund të merren shabllon për Shqipërinë që ka një terren tjetër kulturor e shoqëror”.

Ndërsa, Zhaneta Këmbora, mësuese në Lushnje, thotë se një nismë e tillë i duket e arsyeshme dhe “e domosdoshme”.

Këmbora thotë se një vlerësim i tillë do i ndihmonte mësuesit, të cilët kanë një profesion të vështirë.

“Mësuesi ka nevojë për ndihmë, është profesion që ka një skaner të hapur dhe publik”, tha Këmbora.

LEXONI GJITHASHTU:

• Puna pas pushimeve, psikologia Halilaj këshillon çfarë duhet bërë për shmangien e stresit