Vrasja e Santiago Malkos, Apeli i GJKKO: 25 vite burg për Blendi Tetën

Apeli i GJKKO ka marrë vendimin këtë të enjte duke lënë në fuqi dënimin me 25 vite burg për Blendi Tetën, i përfshire në vrasjen e ish-policit Santiago Malko i njohur dhe si krahu i djathtë i të zhdukurit dhe shumëkërkuarit Ervis Martinaj.

Gjykata e Larte kishte kthyer çështjen për rishqyrtim në Apel ndërsa SPAK kishte kërkuar dënimin e tij me 19 vite burg.

“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Tereza Merkaj (kryesuese), Valdete Hoxha (anëtare) dhe Edlira Petri (anëtare), sot më datë 04.12.2025, shpalli vendimin mbi çështjen penale nr. 60 akti, datë 21.07.2025 regjistrimi.

Kjo çështje është regjistruar pas prishjes nga Gjykata e Lartë të vendimit nr. 32, datë 14.06.2022 të Gjykatës së Posaçme të Apelit për Korrupsionin dhe Krimin e Organizuar dhe kthimit për rishqyrtim me një tjetër trup gjykues – disponuar mbi ankimin e paraqitur nga i pandehuri/ankues B.T., ndaj vendimit nr. 05, datë 26.01.2022 të Gjykatës së Posaçme të Shkallës së Parë për Korrupsionin dhe Krimin e Organizuar.

Gjykata e Posaçme e Apelit për Korrupsionin dhe Krimin e Organizuar vendosi:

1. Lënien në fuqi të vendimit nr. 05, datë 26.01.2022, të Gjykatës së Posaçme të Shkallës së Parë për Korrupsionin dhe Krimin e Organizuar.
2. Shpenzimet e gjykimit në apel i ngarkohen të pandehurit.
3. Kundër këtij vendimi mund të bëhet rekurs në Gjykatën e Lartë brenda 45 ditëve, duke filluar ky afat nga e nesërmja e njoftimit të vendimit të arsyetuar”, thuhet në njoftim.

Santiago Malko, ish-efektiv i policisë, i njohur edhe për lidhjet e tij me botën e krimit, u vra më 27 gusht 2019 në rrugën “Xhanfize Keko” në Tiranë, pranë zonës së Porcelanit. Ai u qëllua me breshëri automatiku teksa udhëtonte me makinën e tij BMW X5 dhe mbeti i vdekur në vend.

Vrasja e tij ishte kulmi i një hakmarrjeje të përgjakshme mes dy grupeve kriminale që rivalizonin për kontrollin e lojërave të fatit dhe aktiviteteve të tjera të paligjshme në Tiranë.

LEXONI GJITHASHTU:

• Pas vitesh hetime FBI arreston autorin e shpërthimit të tubacionit në Uashington
• Përplasja në Kuvend/ Malaj: Gënjeni me zë dhe figurë, Tabaku: Keni injorancë ligjore