Vuçiç: Protestat kanë mbështetje të huaj, lidhen edhe me Kosovën

Presidenti i Serbisë Aleksandar Vuçiç deklaroi sot se protestat e studentëve në vend nuk janë protesta studentore, por ato kanë mbështetje nga jashtë.

Në takimin “E ardhmja, jo e kaluara”, e cila është pjesë e një nisme më të gjerë për dialogun me të rinjtë, Vuçiç tha se një nga arsyet kryesore për protesta është kundërshtimi ndaj miratimit të Rezolutës për Srebrenicën në Kombet e Bashkuara.

Ai tha se “në ditët në vijim do të zbulohen shumë dëshmi që vërtetojnë se pas ngjarjeve të fundit në Serbi ka mbështetje të madhe nga faktorët e huaj.”

Sipas tij, protestat kanë synime jo vetëm të brendshme, por edhe ndërkombëtare, duke akuzuar “të fuqishmit në botë” për “tri arsye”

“Për shkak se duan ta përfundojnë punën rreth Kosovës sa më shpejt, nuk mund të durojnë që Serbia të jetë fuqi lidere në rajon, dhe sepse Serbia i rezistoi votimit të Rezolutës për Srebrenicën në OKB”, tha Vuçiç.

Vuçiç nuk iu përgjigj pyetjes nëse Qeveria e Serbisë do t’i plotësojë kërkesat e studentëve që protestojnë prej javësh në mbarë vendin, duke kërkuar përgjegjësinë për aksidentin në Novi Sad ku 15 persona humbën jetën.

LEXONI GJITHASHTU:

• “I keni duart me gjak!’ Studentët në Serbi protestojnë për viktimat e Novi Sadit
• Protestat në Serbi: Vuçiç u betohet qytetarëve mbi flamur, u rikujton seancën në OKB