Vuçiç: Rafineria serbe e naftës nuk arriti të sigurojë licencën e SHBA, do mbyllet

Presidenti serb Aleksandër Vuçiç tha të martën se rafineria kryesore e naftës në vend, e operuar nga Gazprom Neft i Rusisë nëpërmjet Industrisë së Naftës të Serbisë (NIS), nuk arriti të sigurojë licencën e SHBA-së të kërkuar për të vazhduar operimin nën sanksione dhe tani do të mbyllet.

Duke folur pas një takimi në Beograd me zyrtarët që mbikëqyrin stabilitetin dhe sigurinë energjetike të Serbisë, Vuçiç foli për mbylljen e afërt të rafinerisë, e cila është përballur me muaj të tërë zgjatjesh që kur u listua nën sanksione më 10 janar së bashku me Gazprom Neft, një nga prodhuesit dhe eksportuesit kryesorë të naftës në Rusi.

Vuçiç tha se Serbia kishte kërkuar zyrtarisht një licencë nga SHBA-ja për të lejuar vazhdimin e operacioneve, por kërkesa nuk u miratua.

“Jam i zhgënjyer. Ne kemi vendosur që rafineria të ndërpresë operacionet e saj, por gjithashtu ramë dakord që pagat dhe pagesat e ngjashme do të zgjidhen deri në fundjavë. Rafineria do të përcaktojë kohën e mbylljes”, tha ai.

Vuçiç shtoi se rezervat ekzistuese do të mbulojnë nevojat e rafinerisë deri në fund të vitit dhe vuri në dukje se Serbia shpreson të finalizojë një marrëveshje të re gazi me Rusinë deri në fundjavë.

Nëse jo, tha ai, negociatat për marrëveshje alternative do të fillojnë të hënën.

NIS u vendos në listën e sanksioneve të SHBA-së

Departamenti i Thesarit i SHBA-së njoftoi më 10 janar se kishte ndërmarrë hapa të gjerë për të ndihmuar në uljen e të ardhurave të Rusisë nga energjia në përputhje me angazhimet e G7-ës, duke shtuar Gazprom Neft, Surgutneftegas dhe degët e tyre në listën e sanksioneve. Midis tyre ishte edhe NIS.

Beogradi kishte kërkuar më parë shtyrje, duke thënë se i duhej më shumë kohë për të zbatuar ndryshimet e kërkuara nga SHBA-të. Serbia mori gati një vit shtyrjesh para afatit aktual.

LEXONI GJITHASHTU:

• BE: Serbia po shkel obligimet duke kundërshtuar anëtarësimin e Kosovës në Interpol
• Serbia thotë se ka arrestuar një ish-pjesëtar të UÇK-së