Vuçiç: Serbia do të aplikojë reciprocitet për shkak të Kosovës

Presidenti i Serbisë, Aleksandar Vuçiç, tha se në seancën e mbajtur këtë të martë të Qeverisë së Serbisë, ku është diskutuar për Kosovën, janë ndarë detyrat në sferën e politikës së jashtme.

“Kemi vendosur t’i respektojmë më shumë vendet mike ndaj Serbisë. Të kujdesemi për politikën dypalëshe dhe të mos kalojmë kufijtë e reciprocitetit. Nëse dikush nuk e respekton integritetin tonë territorial, pse ta respektojmë ne të tijin”, tha Vuçiç, transmeton Shërbimi i Ballkanit i Radios Evropa e Lirë.

Duke folur në një konferencë për media në Beograd, ai tha se Serbia është mirënjohëse ndaj vendeve që kanë votuar të hënën kundër pranimit të Kosovës në Këshillin e Evropës.

“Ne i jemi mirënjohës sidomos Hungarisë. Ata kanë dëshmuar se janë miqtë më të mëdhenj të Serbisë”, tha Vuçiç.

Ai shtoi se Beogradi e ka ditur që Kosova e ka shumicën e mbështetjes në Këshillin e Evropës.

“Faleminderit Spanjës, Qipros, Rumanisë, Azerbajxhanit, Gjeorgjisë, që kanë votuar për të mbështetur Kartën e Kombeve të Bashkuara”, tha Vuçiç, duke iu referuar vendeve që kanë votuar kundër vendimit për ta dërguar kërkesën e Kosovës për anëtarësim në Këshillin e Evropës tek Asambleja e tij Parlamentare.

LEXONI GJITHASHTU:

• Shqipëria dakordësi me Ukrainën për çmimin e grurit, 4 shtete të BE bllokadë
• Kosova kalon me sukses fazën e parë të anëtarësimit në Këshillin e Evropës