Kosova kalon me sukses fazën e parë të anëtarësimit në Këshillin e Evropës

Komiteti Ministror i Këshillit të Evropës, ka marrë vendim që t’ia përcjellë Asamblesë Parlamentare të Këshillit të Evropës kërkesën për anëtarësimin e Kosovës.

Në lidhje me lajmin ka reaguar dhe kryeministri i Kosovës Albin Kurti, i cili përmes një postimi në rrjete sociale shkruan se ky vendim bën që Kosova të kalojë me sukses fazën e parë të anëtarësimit në Këshillin e Evropës.

“Komiteti i Ministrave të shteteve anëtare, me mbi dy të tretat e votave të nevojshme, i dha sot mbështetje aplikimit të Kosovës në Këshillin e Evropës, duke përmbyllur kështu fazën e parë të anëtarësimit të plotë të Republikës sonë në këtë organizatë të rëndësishme ndërkombëtare.

Shteti ynë do të jetë vlerë e shtuar për Këshillin e Evropës. Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në shtetin tonë.

Falënderoj ministrinë e Punëve të Jashtme dhe Diasporës, ministren Gërvalla, zëvendësministrin Ahmeti dhe ekipet e tyre për punën e pandërprerë, si dhe partnerët tanë e shtetet anëtare, për përkrahjen e pakursyer”, shkruan Kurti.

LEXONI GJITHASHTU:

• Serbët bojkuan zgjedhjet, shpallet rezultati për komunat në Veri
• Kurti: Bojkoti i zgjedhjeve në veri u imponua nga fushata kërcënuese e Beogradit
• Radoiçiç: Nuk lejojmë që Veriu të udhëhiqet nga ata që fituan 1-2% të votave