“Xhaçka ka qenë shumë në siklet”, Murrizi: Reagimi për ambasadoren s’është lapsus

“Nuk është lapsus”. Kështu u shpreh në një intervistë për Euronews Albania ish-deputeti Myslim Murrizi teksa komentoi reagimin e Ministrisë së Jashtme për zëvendësimin e ambasadores amerikanë Yuri Kim.

“Nga informacionet që kam unë znj. Xhaçka ka qenë shumë në siklet nga ora 10 paradite deri në darkë kur ka nxjerrë atë deklaratë. Nuk është naive në diplomaci znj. Xhaçka, e di mirë që nuk i takon asaj. Më pas doli edhe Rama”, u shpreh Myslim Murrizi.

Më 8 dhjetor, Ministria e Jashtme njoftoi se kanë nisur procedurat për zëvendësimin e ambasadores Yuri Kim.

Yuri Kim mbërriti në Tiranë si Ambasadorja e Shteteve të Bashkuara të Amerikës në Republikën e Shqipërisë në janar 2020.

Ambasadorja Kim, një diplomate karriere, ka punuar mbi sfida kyçe të politikës së jashtme dhe sigurisë kombëtare në mbarë Europën, Azinë dhe Lindjen e Mesme.

Ka qenë drejtoreshë e Çështjeve të Europës Jugore dhe ka mbuluar Turqinë, Greqinë, Qipron dhe më gjerë rajonin e Mesdheut Lindor; si drejtoreshë e Zyrës së Çështjeve Europiane të Sigurisë dhe ato Politiko-Ushtarake, ka mbuluar NATO-n dhe Organizatën për Siguri dhe Bashkëpunim në Europë (OSBE).

Më herët ka qenë Shefe e Kabinetit e Zëvendës Sekretarit të Shtetit dhe drejtoreshë e Qendrës për Studimin e Administrimit të Diplomacisë. Më herët në karrierën e saj, ka qenë Ndihmëse e Posaçme e Sekretarit të Shtetit Colin Powell, si dhe Ndihmëse e Posaçme e Ndihmës Sekretarit të Shtetit për Çështjet e Azisë Lindore dhe Paqësorit.

Mandatet e saj jashtë SHBA përfshijnë Turqinë, Irakun, Republikën e Koresë, Japoninë dhe Kinën.

LEXONI GJITHASHTU:

• Nisin procedurat për zëvendësimin e Yuri Kim
• Pse po ndërhyn politika për kreun e SPAK? Debat mes Koçit, Murrizit e Ramajt
• “KLP nuk është e lirë”, Murrizi: Ka përplasje mes Ramës dhe ambasadores Kim