Zaev jep zyrtarisht dorëheqje nga posti i kryeministrit të RMV

Zoran Zaev ka dorëzuar zyrtarisht dorëheqjen e tij në Kuvendin e Maqedonisë. Dorëheqjen nga Qeveria dhe nga partia e tij, Zaev e ka paralajmëruar më 31 tetor pas humbjes së thellë të Lidhjes Social Demokrate në zgjedhjet lokale.

Deri nga mesi i janarit të vitit 2022, Maqedonia e Veriut do të ketë Qeveri të re, që do të udhëhiqet nga Dimitar Kovaçevski, kryetari i ri i Lidhjes Social Demokrate (LSDM). Në krye të ekzekutivit, ai do ta zëvendësojë Zaevin.

Ai ka marrë përgjegjësinë për humbjen e kësaj partie përballë partisë opozitare, VMRO-DPMNE, dhe ka dhënë dorëheqje edhe nga drejtimi i saj.

Ai e kishte shtyrë dorëheqjen e paralajmëruar për gati dy muaj, pasi LSDM-ja ka humbur edhe shumicën parlamentare, për shkak të largimit të Lëvizjes Besa nga Qeveria.

Për të shmangur zgjedhjet e parakohshme, Zaev ka ftuar në Qeveri partinë tjetër shqiptare, Alternativa, me të cilën ka arritur marrëveshje për koalicion.

Mandatari, sipas Kushtetutës, brenda 20 ditësh, duhet të dorëzojë për miratim në Kuvend përbërjen e re qeveritare, e cila votohet me 61 vota të deputetëve. Shumica parlamentare numëron 64 deputetë.