Zbardhet shpërthimi me tritol në Tiranë, organizatori i pagoi 1 mln lekë të miturit

Policia e Tiranës ka zbardhur shpërthimin me tritol që ndodhi në ambientet e një fasonërie në zonën e “Freskut” në kryeqytet disa ditë më parë.

Në pranga ka përfunduar një 46-vjeçar, si organizator i kësaj ngjarjeje kriminale dhe një 16-vjeçar, në rolin e autorit të vendosjes së lëndës plasëse.

46-vjeçari e joshi të miturin duke i ofruar 1 milion lekë të vjetra për vendosjen e sasisë së eksplozivit.

Policia ka sekuestruar një biçikletë të përdorur nga 16-vjeçari, e dyshuar e vjedhur më parë, si dhe veshjet që ai ka përdorur gjatë vendosjes së eksplozivit.

Materialet proceduriale në ngarkim të tyre i kaluan Prokurorisë, për veprime të mëtejshme procedurale.

Ende nuk janë bërë publike motivet e kësaj ngjarjeje të rëndë.

“Si rezultat i këtij operacioni u bë arrestimi i shtetasit E. A., 46 vjeç dhe i një shtetasi 16 vjeç. Nga veprimet hetimore dhe provat e siguruara dyshohet se 46-vjeçari e ka shtytur 16-vjeçarin, duke i ofruar shumë 100 000 lekë të rinj, për të vendosur sasisë e lëndës plasëse në fasonerinë në pronësi të shtetasit R. G. Në cilësinë e provës materiale u sekuestruan një biçikletë e përdorur nga 16-vjeçari, e dyshuar e vjedhur më parë, veshjet që ai ka përdorur gjatë vendosjes së eksplozivit, si dhe një mekanizëm shkrehës arme, e cila u gjet gjatë kontrollit të banesës së shtetasit E. A”, njofton policia.