Zelensky në Romë, pritet të zhvillojë takim me Papën

Volodymyr Zelensky pritet të takojë gjatë vizitës së tij në Romë,  Sergio Mattarella, Giorgia Meloni dhe Papën.  Takimi i mundshëm i presidentit ukrainas me Papatin nuk është i lidhur me “misionin e paqes” për të cilin Papa ka folur ditët e fundit.

Sipas burimeve, Zelensky kërkoi vetëm disa ditë më parë që të pritej nga Papa si pjesë e vizitës së tij në Romë.

Si pjesë e një turneu evropian që do ta çojë atë në Berlin gjatë fundjavës, presidenti ukrainas po ndalon në kryeqytet për herë të parë që nga fillimi i pushtimit rus, pasi kishte vizituar tashmë Uashingtonin, Londrën, Parisin dhe Brukselin dhe ditët e fundit Helsinkin dhe Hagën. Vatikani vazhdon të punojë në atë “mision paqeje” midis Kievit dhe Moskës të shpallur nga vetë Françesku, por ende “konfidencial”.

Burime të Vatikanit bëjnë të ditur se “është e mundur që Papa të takohet me presidentin ukrainas”, pa specifikuar vendin apo kohën. Papa është ftuar vazhdimisht të shkojë në Kiev, por ai vetë ka vendosur gjithmonë kushtin që të mund të shkojë edhe në Moskë, pa marrë megjithatë përgjigje nga Kremlini.

Megjithatë, puna diplomatike “po vazhdon”, njoftoi dje Sekretari i Shtetit i Vatikanit, Kardinali Pietro Parolin, duke folur për “kontakte” dhe lajme “në nivel konfidencial”.

As Gjermania nuk e ka konfirmuar zyrtarisht vizitën në Berlin, ku, sipas thashethemeve të zbuluara nga një tabloid javën e kaluar, Zelensky do të takohet me kancelarin Olaf Scholz dhe presidentin Frank-Walter Steinmeier të shtunën.

LEXONI GJITHASHTU:

• Ndeshja finale e Champions League zhvendoset nga Stambolli? Reagon UEFA
• VIDEO| Rama mbërrin në Durrës për mbylljen e fushatës elektorale