Rezultati i zgjedhjeve të 14 majit ishte një triumf për Partinë Socialiste, që fitoi thellë në 53 bashki dhe opozita arriti të fitonte ngushtë në vetëm 7 bashki. Edhe pse me këtë diferencë të madhe, nuk kanë munguar ankimimet nga opozita në KQZ.
Përveç ankesave të shumta në disa bashki për procesin e numërimit të votave për këshillat bashkiak, koalicioni opozitar “Bashkë Fitojmë” ka ankimuar rezultatin në 6 bashki për votat që janë hedhur për kryetarët e bashkive.
Në dy bashkitë ku u votua dhe u numërua elekronikisht, Kamzë dhe Elbasan, koalicioni kërkon përsëritje të votimit, duke pretenduar kompromentimin e paisjeve elektronike të cilat sipas opozitës nuk kanë reflektuar vullnetin e qytetarëve më 14 maj.
Për të mbështetur këtë pretendim, “Bashkë Fitojmë” kërkon që të auditohen nga një kompani ndërkombëtare të gjitha pajisjet e votimit dhe numërimit elektronik.
Ndërkohë në 4 bashki të tjera, Krujë, Kuçovë, Belsh dhe Rrogozhinë kërkohet përsëritja e procesit të numërimit të votave.
Nëse për Krujën, kërkesa ankimore është rrëzuar nga KAS, mbetet për t’u parë se cila do të jetë vendimmarrja për Kuçovën, Belshin dhe Rrogozhinën, tre bashki ku kandidatët e PS fituan shumë ngushtë, me vetëm disa dhjetëra vota.
Deri në përfundim të procesit të ankimimit, KQZ nuk do mund të certifikojë zyrtarisht fitoren për këta kryebashkiakë. Këto ankimime janë vijim i fazës së parë të kundërshtimit të zgjedhjeve nga opozita, që ka paralajmëruar se pasi të bëj analizën e brendshme do të bëhet gati edhe për protesta.
LEXONI GJITHASHTU:
- Petro Koçi: Basha nuk ka impakt politik, s’është personalitet që premton fitore
- Dhuna në Veri, NATO dislokon forco shtesë në Kosovë