Zgjedhjet në Maqedoninë e Veriut, partitë ende larg konsensusit për datën

Ende asnjë përafrim qëndrimesh mes partive në Maqedoninë e Veriut sa i përket zgjedhjeve të parakohshme.

Për VMRO/DPMNE-në, zgjedhjet në qershor janë të pamundura sepse kjo do të nënkuptonte shkeljen e afateve të Kodit zgjedhor.

“Nëse nuk arrihet ndonjë marrëveshje rreth datës, nuk përjashtohet opsioni i bojkotimit të zgjedhjeve”, është shprehur sekretari i përgjithshëm i partisë, Igor Janushev në intervistë për Radio “Evropa e Lirë”.

LSDM nxiton për zgjedhje. Kreu i partisë, Zoran Zaev tha se nëse nuk arrihet marrëveshje për datën e zgjedhjeve, do të fillojnë të rrjedhin afatet ligjore për procesin zgjedhor, megjithëse do të doja zgjedhje në të cilat do të merrte pjesë edhe opozita. Partia qeverisëse është për zgjedhje sa më të shpejta.

Mosmarrëveshje lidhur me datën ka edhe tek partitë shqiptare. BESA dhe PDSH-ja janë për zgjedhje në qershor. Aleanca për Shqiptarët dhe Alternativa vlerësojnë se votuesit do të përgatiteshin më mirë psiqikisht nga fundi i korrikut, ndërsa BDI-ja është për zgjedhje madje edhe në shtator, në varësi të numrit të të infektuarve me COVID-19.

Nga kabineti i Presidentit Stevo Pendarovski tashmë theksojnë se nuk do të ketë takim të ri liderësh, derisa partitë t’i përafrojnë qëndrimet e tyre për një datë të mundshme.