Zjarret në vend, 12 vatra ende aktive, ja zonat më problematike

Ministria  Mbrojtjes thotë se po punohet për shuarjen e zjarreve në 12 vatra, të cilat vijojnë të jenë aktive, ndërsa 14 të tjera të raportuara gjatë ditës së sotme janë shuar.

Në njoftim bëhet e qartë se po monitorohen vatrat e zjarrit ende aktive në fshatin Skuraj, Malin e Kakarriqit(bashkia Lezhë), në Malin e Lopçit(Shkodër), në zonën pyjore Bode, mbi fshatin Lozhan(bashkia Maliq), etj.

Nën kontroll është vënë edhe zjarri në fshatin Qarrishtë, bashkia Librazhd, në një sipërfaqe pyjore në zonën e Parkut Kombëtar Shebenik.

Puna vijon dhe nuk paraqet rrezik për përhapje edhe zjarri në vendin e quajtur “Mali i Qukësit”, bashkia Prrenjas.

Forcat janë angazhuar dhe kanë nën kontroll situatën në vatrën e zjarrit në Malin Lugë, fshati Kus(bashkia Tiranë), si dhe në vendgrumbullimin e mbetjeve të bashkisë Mallakastër.

Në fshatin Mazhar(bashkia Selenicë) dhe në fshatin Bolenë(bashkia Himarë) janë aktivizuar vatra zjarri në sipërfaqe me shkurre dhe bimësi të dendur.

Me vëmendje po shihet situata e krijuar nga zjarri në fshatin Ninat, bashkia Konispol, në sipërfaqe me kullotë. Era e fortë po favorizon flakët, por janë larg zonës së banuar.

Në operacionet për shuarjen e zjarreve janë aktivizuar 450 forca dhe 33 mjete. Në mbështetje të këtyre forcave janë të angazhuar 130 trupa nga Forcat e Armatosura.

LEXONI GJITHASHTU:

• Arrestohet për zjarrvënie 48-vjeçari në Durrës, flakët rrezikuan disa banesa
• Zjarr në fshatin Drenovë, marrin flakë stallat e fermerëve