Lapaj: Manja dhe Bardhi gënjyen, amnistia do lirojë zyrtarët e dënuar nga GJKKO

Kreu i Nismës “Shqipëria Bëhet”, Adriatik Lapaj tha në emisionin Review në Euronews Albania se amnistia penale e miratuar dy ditë më parë në Parlament po përdoret për të delegjitimuar reformën në drejtësi.

Sipas Lapajt, dy zyrtarët e lartë, ministri UIlsi Manja dhe kreu i grupit të PD, Gazment Bardhi gënjyen në Parlament kur u zotuan se kjo amnisti nuk liron zyrtarët e dënuar nga GJKKO.

“Të bësh amnisti për qytetarët e zakonshëm është në rregull, por të përdorësh amnistinë për të delegjitimuar reformën në drejtësi është e papranueshme. Dje gënjyen edhe Manja edhe Bardhi, se thanë nga kjo amnisti nuk preken zyrtarë të lartë që janë dënuar nga GJKKO, pasi sipas kësaj amnistie ata përftojnë. Pra zyrtarët e lartë gënjyen. Çështja tjetër është mesazhi që jepet; këta shefat e politikës që marrin vendime në parlament u thonë vartësve të tyre merreni përsipër burgun se ju nxjerrim ne. Mesazhi tjetër; është dekurajim që u bëhet institucioneve të reja të drejtësisë, se mblidhesh si parlament, u thua atyre prokurorëve kot e keni ne bëjmë si duam. Nga ana tjetër është tallje me lekët e shqiptarëve, se ata prokurorët e SPAK paguhen sa frëngu pulën”, tha Lapaj.

LEXONI GJITHASHTU:

• Amnistia penale, avokati: Të përfshiheshin dhe kultivuesit e kanabisit
• Avokati: Asnjë protestues nuk përfiton nga amnistia, djalli fshihet në procedurë