280 vizita| Virozat zenë vendin e parë, shtrimet në Spitalin e Durrësit, të ulëta

Në Urgjencën e Spitalit të Durrësit fluksi i emergjencave është i lartë.

Mesatarisht në 24 orë, 280 persona paraqiten për të kërkuar ndihmë mjekësore, prej të cilave virozat zënë vendin e parë.

“Normalisht, me uljen e temperaturave u ndje njëfarë rritje e numrit të rasteve që paraqiten në Urgjencën e spitalit të Durrësit. Aktualisht kemi mesatarisht 270-280 vizita 24-orëshe. Është një rritje me 20-30% krahasuar me muajt disi më të ngrohtë”, tha mjeku i Urgjencës, Bernard Qama.

“Pak a shumë, numri i rasteve që vijnë me viroza stinore është diku tek 50-60 ndoshta dhe më tepër në varësi të ditëve”, shtoi ai.

Lajmi i mirë është se numri i personave që kërkojnë shtrim spitalor nuk është i lartë.

“Janë një numër i vogël rastesh, kryesisht pacientë që janë me sëmundje kronike, pasi normalisht u komplikohen sëmundjet ekzistuese”, tha Qama.

Problem mbetet anashkalimi i vizitës te mjeku i familjes, që sipas mjekut duhet të jetë kontakti i parë i çdo pacienti.

“Problematika kryesore qëndron, që shumica e njerëzve prezantohen direkt në Urgjencë, pra që anashkalojnë mjekun e familjes, që është një hallkë kryesore për pacientët, por dhe për ne. Normalisht ne na ul fluksin e punës, por dhe për ta, që të marrin një shërbim disi më të shpejtë, sepse kuptohet që kur fluksi është kaq i lartë bëhet pak më e vështirë edhe puna e mjekut të Urgjencës”, tha Qama.

“Që nga Rrogozhina, Kavaja, Shijaku, Ishmi, rrethinat e Durrësit, të gjithë përplasen në Urgjencën e Durrësit”, shtoi ai.

Me qëllim ruajtjen, mjeku apelon shmangien e daljeve herët në mëngjes a vonë në mbrëmje për moshën e tretë, si dhe shmangien e qëndrimit në ambiente të mbyllura sidomos për të vegjlit.

LEXONI GJITHASHTU:

•  “70 fëmijë në ditë në spital”/ Pediatria në Korçë i mbushur me të vegjlit me viroza
• Virozat sezonale/ Mjekët infeksionist: 90 urgjenca në ditë, rastet janë dyfishuar