Ministrja e Drejtësisë në Kosovë, Albulena Haxhiu, ka bërë të ditur të enjten se 31 mjetet transportuese që autoritetet e Kosovës i kanë konfiskuar vitin e kaluar në Banjskë të Zveçanit, i janë dhënë për shfrytëzim Policisë së Kosovës.

Më 24 shtator të vitit të kaluar, në Banjskë në veri të Kosovës, një grup i armatosur serb e ka sulmuar Policinë e Kosovës, duke e vrarë rreshterin Afrim Bunjaku, shkruan REL.

Më pas, në shkëmbim e sipër të zjarrit janë vrarë edhe tre sulmues serbë.

Kosova e konsideron këtë sulm si terrorist dhe e fajëson shtetin e Serbisë për organizim dhe kryerje të tij, derisa Beogradi zyrtar mohon diçka të tillë.

Përgjegjësinë për sulmin e ka marrë ish-nënkryetari i Listës Serbe, partisë më të madhe të serbëve në Kosovë, Millan Radoiçiç.

Haxhiu ka thënë të enjten para mediave se, përveç automjeteve, Policia pati konfiskuar edhe vilën, restorantin dhe një banesë në emër të gruas së Radoiçiçit.

Autoritetet e drejtësisë në Beograd kanë ngritur disa akuza ndaj tij, mirëpo e kanë lënë të lirë, duke ia ndaluar vetëm shkuarjen në Kosovë.

Haxhiu ka thënë se u bashkohet thirrjeve të vazhdueshme të kryeministrit të Kosovës, Albin Kurtit që rasti i Banjskës të trajtohet me prioritet nga institucionet përgjegjëse në Kosovë.

Edhe gjashtë muaj pas kryerjes së sulmit, për Radoiçiçin vazhdon të mos ketë një padi nga sistemi i drejtësisë në Kosovë, ani pse një e tillë ishte paralajmëruar deri në fund të marsit të këtij viti.

Radoiçiç besohet se është në Serbi, por është i lirë.

LEXONI GJITHASHTU:

• Janjiç: Përdorimi i mercenarëve nga Serbia në Banjskë, e rrezikshme
• KFOR ekzaminon raketahedhësit e gjetur nga Policia e Kosovës në Banjskë