37 milion fëmijë duhanpirës, OBSH: Industritë po i joshin me produktet e reja

Fëmijët dhe adoleshentët janë vënë në fokus të industrisë së duhanit për ti bërë ata përdorues, duke zëvendësuar kështu klientët e tyre që heqin dorë nga duhani apo ndërrojnë jetë.

Ky konstatim vjen nga ekspertët e Organizatës Botërore të Shëndetësisë, të cilët në ditën botërore kundër duhanit pohojnë se në të gjithë botën janë 37 milion fëmijë të grupmoshës 13-15 vjeç që përdorin duhan.

Raporti i fundit ka konstatur se përdorimi i produkteve elektronike të duhanit është më i përhapur tek të rinjtë se sa moshat e rritura.

Në Rajonin Evropian të OBSH-së, cigaret elektronike kanë tejkaluar cigaret konvencionale në popullaritet, me 32% të 15-vjeçarëve që raportojnë se i kanë përdorur të paktën një herë dhe 20% që janë përdorues aktual.

Gama e produkteve që industria e duhanit përdor për të tërhequr të rinjtë është zgjeruar ndjeshëm, nga cigaret, puro dhe shisha tek produktet më të reja si cigaret elektronike, duhani me ngrohje, vape apo qese nikotine. Përdorimi i aromave të ndryshme dhe përshtatja e produkteve me imazhe për fëmijët i bën edhe më tërheqëse për to.

Eksperëtët thonë se cigaret elektronike që sipas kompanive konsiderohen më të sigurta se duhani tradicional, kanë përqindje më të lartë nikotine, e cila krijon varësi dhe është e dëmshme për fëmijët.

Edhe pse ende nuk dihen efektet afatgjata në shëndet, tashmë është vërtetuar se cigaret elektronike gjenerojnë substanca toksike, disa prej të cilave njihen se shkaktojnë kancer dhe disa rrisin rrezikun për probleme të zemrës dhe mushkrive.

Përdorimi i cigareve elektronike gjithashtu mund të ndikojë në zhvillimin e trurit, duke ndikuar uljen e aftësisë së të nxënit për nxënsit dhe shtim të ankthit.

LEXONI GJITHASHTU:

• Irlanda pritet të rrisë në 21 vjeç moshën e blerësve të duhanit
• Sondazhi/ Pse politikat e BE për reduktimin e duhanit nuk janë mjaftueshëm eficente