Ministrja e Arsimit Evis Kushi thotë se në shkollat e vendit janë regjistruar 450 mijë nxënës, nga të cilët 29 mijë fëmijë që u ulën për herë të parë në klasë të parë.

Në një intervistë për Euronews Albania ministrja u shpreh se shifrat zyrtare do të dalin në tetor dhe pritet të jenë shumë më të larta.

“Këtë vit kemi rritur numrin e mësuesve ndihmës. Nga 1300 kemi edhe 250 mësues më shumë që i bie 1 mësues për 2-3 nxënës me aftësi ndryshe. Kjo e rrit cilësinë e arsimit dhe na përafron me standardet e BE”, u shpreh ministrja.

Kushi tregoi se këtë vit shkollor është rritur edhe numri i punonjësve psikosocialë dhe oficerëve të sigurisë në shkolla.

“70 oficerë sigurie më shumë. Risia e këtij viti është se oficerët e sigurisë nuk do të jenë vetëm në shkollat e mesme por edhe ato 9-vjeçare me numër të madh nxënësish”, u shpreh Kushi.

Kushi nënvizoi se do të ketë programe të reja përsa i takon kurrikulave dhe sistemit arsimor.  Ministrja shtoi se në klasën e parë do të futet teknologjia.

“Këtë vit kemi programe të reja që rrisin cilësinë përsa i takon kurrikulave dhe sistemit arsimor në përgjithësi. Kemi përfshirë në klasën e parë teknologjinë e informacionit dhe komunikimit. Nxënësit kanë një korrikulë të veçantë për të marrë njohuritë bazë”, – tha ajo.

LEXONI GJITHASHTU:

• Vijon mësimi me turne në Korçë, mbyllen 3 shkolla
• Pas rikonstruktimit, shkolla “Sami Frashëri” në Tiranë hap dyert për nxënësit