Real Madrid e cilëson Arbeloan trajnerin e së ardhmes, ka besimin e Perez

Alvaro Arbeloa nuk shihet si trajner i përkohshëm i Real Madridit, pasi kontrata e firmosur prej tij e mban atë të lidhur me ekipin edhe përtej verës. Presidenti Fiorentino Perez beson plotësisht se ish-mbrojtësi është zgjedhja e duhur për “Los Blancos”.

Sipas detajeve të kontratës, 42-vjeçari do të qëndrojë në krye të ekipit përtej sezonit aktual, duke konfirmuar se nuk është trajner i përkohshëm. Nëse performanca do të jetë pozitive, ai mund të vazhdojë drejtimin e klubit për një periudhë më të gjatë.

Mediat spanjolle raportojnë se kontrata e Arbeloas ka një kohëzgjatje prej 1.5 vitesh, me mundësi rinovimi nëse objektivat e klubit realizohen, ndërsa dështimi mund të sjellë shkarkimin. Arbeloa ka qenë i rezervuar në deklaratat e para si trajner dhe ka formuar një staf prej gjashtë anëtarësh që do ta mbështesin në detyrën e tij.

Prova e parë për Arbeloan pritet këtë të mërkurë, në përballjen e Real Madridit me Albacete në kupë. Pas kësaj, skuadra do të përballet me Levanten në La Liga dhe Monaco-n në Champions League, duke i dhënë trajnerit mundësinë për të treguar vlerën e tij në disa fronte të rëndësishme.