BE dënon dhunën gjatë protestës kundër priftit serb në Mal të Zi, thirrje për vetëpërmbajtje

Bashkimi Europian ka shprehur shqetësimin për trazirat e së dielës në Mal të Zi ku dhjetëra persona mbetën të plagosur pas protestave kundër shugurimit të priftit serb. BE shprehet se liria e tubimit është e drejtë themelore që duhet respektuar, ndërsa bën thirrje për vetëpërmbajtje.

Edhe Ambasadat e Gjermanisë, Italisë, Francës, Britanisë, Shteteve të Bashkuara dënuan dhunën gjatë protestave të djeshme.

Dhjetëra persona u plagosën në protestat që u zhvilluan një ditë më parë në Mal të Zi kundër shugurimit të kreut të Kishës Ortodokse, Joanikije në qytetin e Cetinjes.

Policia përdori gaz lotsjellës për të shpërndarë protestuesit, disa prej të cilëve hodhën gurë, shishe dhe fishekzjarre.  20 policë dhe 30 protestues u dërguan në spital. Kryeministri malazez, Zdravko Krivokapiç i cilësoi sulmet ndaj policisë si terrorizëm.

Ai fajësoi Partinë Demokratike të Socialistëve të presidentit Milo Gjukanoviç për organizimin e protestave. Ndërsa Gjukanoviç, i cili kundërshtoi ceremoninë, akuzoi policinë për forcë të tepruar. Manifestuesit thanë se çdo objekt kulti i ndërtuar në Malin e Zi i përket popullit dhe këtij shteti.

LEXONI GJITHASHTU:

• Mal i Zi, protesta për pronat e Kishës Ortodokse Serbe
• Të paktën 20 të plagosur nga protestat për kishën serbe në Malin e Zi