Punonjësit e burgjeve paguhen pjesërisht për orët shtesë, thotë përfaqësuesi i Sindikatës së Shërbimeve Policore

“Ka me dhjetëra raste ku punonjësit e burgjeve bëjnë edhe punë të dyta”. Kështu u shpreh për Euronews Albania, Valentin Macaj, përfaqësues i Sindikatës së Shërbimeve Policore të Shqipërisë teksa komentoi gjendjen ekonomike në të cilën ndodhen punonjësit e burgjeve.

“Kemi dhjetëra raste që marrin lejen e zakonshme që thonë do blej një televizor në familje, por do shkoj të punoj në Greqi. Bëjnë edhe punë të dytë si roje”, u shpreh ai, duke theksuar se deri më tani i është dhënë më shumë prioritet Policisë së Shtetit.

Z. Macaj nënvizoi se shumica e punonjësve kanë stres dhe janë të ngarkuar nga ana psikologjike pasi diskriminohen me pagesat.

“490 mijë lekë paguhet një punonjës bashkë me orët e natës. Paguhen pjesërisht për orët e punës shtesë”, tha teksa tregoi se edhe nëse sëmuren nuk mund të marrin dot trajtim në spitalet shtetërore.

Një problematikë tjetër që përmendi z.Macaj është edhe mungesa e armatimit tek këta punonjës.

Ai nënvizoi se ata përballen me kriminelët dhe kur dalin jashtë burgun marrin presione.