Nuk ka rrjedhje të materialit radioaktiv, thotë Agjencia e OKB-së

Reaktorët në termocentralin bërthamor të ZaporizhzhIa në Ukrainë janë të sigurt, pavarësisht se janë duke u sulmuar nga forcat ruse, tha kreu i Agjencisë Ndërkombëtare të Energjisë Bërthamore (IAEA) Rafael Mariano Grossi.

Ai u shpreh se nuk ka pasur rrezatim radioaktiv nga centrali bërthamor i Ukrainës që ishte në shënjestër të sulmit nga Rusia në orët e hershme të 4 marsit.

Grossi tha se agjencia ka qenë në kontakt me rregullatorin bërthamor të Ukrainës dhe centralin bërthamor të Zaporizhzhia pasi një ndërtesë në afërsi u godit.

“Ne jemi me fat që nuk ka pasur një rrjedhje të materialit radioaktiv dhe integriteti i reaktorëve nuk është cenuar”, tha Grossi në një konferencë për media në Vjenë të premten.

Zjarri në objekt ngjalli frikën e një incidenti të mundshëm, por IAEA thotë se nuk u lëshua asnjë material radioaktiv.

Fabrika është pushtuar nga forcat ruse.

Megjithatë raportohet se situata në terren është “jashtëzakonisht e tensionuar dhe sfiduese”, paralajmëroi ai.

Çfarë duhet të dini për këtë central bërthamor?

Termocentrali bërthamor i Zaporizhzhia në Ukrainë është më i madhi në Evropë.

Ndodhet në jug të vendit, pranë lumit Dnieper dhe ka një kapacitet total prej pothuajse 6,000 megavat – ose mjaftueshëm për të furnizuar me energji elektrike rreth katër milionë shtëpi.

Ndërtimi i këtij centrali filloi në vitin 1979 kur Ukraina ishte ende pjesë e Bashkimit Sovjetik.

Janë gjashtë reaktorë të projektuar nga sovjetikët në vend, i fundit prej të cilëve u vu në punë në vitin 1995. Këta reaktorë kanë një jetëgjatësi nga 40 deri në 60 vjet.

Në kohë normale, Zaporizhzhia mund të prodhojë rreth 20% të të gjitha nevojave të Ukrainës për energji elektrike dhe gjysmën e energjisë së saj bërthamore.

LEXONI GJITHASHTU: 

• Përditësime LIVE 4 mars: Rusia merr kontrollin e centralit bërthamor