Të moshuarit në Korçë s’paguajnë biletë për transportin urban

Këta të moshuar sot janë duke pritur autobusin. Ndryshe nga të moshuarit e tjerë në Shqipëri, këta gjyshër në Korçë nuk paguajnë asnjë biletë për transportin publik, prej vitit 2011.

Euronews Albania pyeti disa prej tyre se sa lehtësi u sillte kjo ndihmesë. “Jo nuk e paguajmë, falas e kemi. Jam me librezë”, u shpreh një i moshuar.

“E kam falas transportin”, tha një tjetër. Lorena Saro, punonjëse e bashkisë së Korçës shprehet se kjo është një nga ndihmat e shumta që ky institucion jep për këtë grup-moshë.

“Pas shumë projektesh që Bashkia Korçë ofron për moshën e tretë siç është edhe hapja e qendrave komunitare, të cilat ofrojnë shërbime si kafe mëngjesi ose shtypin e ditës falas për moshën e tretë, Bashkia Korçë ka nisur një projekt tepër ambicioz afatgjatë siç është edhe kartat e pensionistit. Që prej vitit 2011, ky shërbim ofrohet falas për gjithë moshën e tretë në qytetin e Korçës”, u shpreh ajo.

10 milionë lekë të reja i kushton kjo nismë Bashkisë së Korçës, ndërkohë që synohet që e njëjta iniciativë të shtohet e tek grupet e tjera në nevojë.