Mbi 1/5 e popullsisë e varfër në Shqipëri

Numri i personave që jetojnë me më pak se 5.5 dollarë në ditë arriti në 622 mijë në vitin 2021. Shifra tregon se një në 5 njerëz janë të varfër në vend dhe në raport me vendet e rajonit, Shqipëria kryeson me nivelin më të lartë të varfërisë.

Në vitin 2021 kishte 622 mijë persona të varfër, nga 885 mijë që ishin në 2020-në.

Rimëkëmbja e shpejtë e ekonomisë nxori nga kriza, 263 mijë njerëz të cilët në vitin e pandemisë merrnin më pak se 5.5 dollarë në ditë.

Të dhënat tregojnë se niveli i varfërisë në Shqipëri është i lartë, dhe pritet të ulet këtë vit. Por, për shkak të çmimeve të rritura, dalja nga varfëria do të jetë e ngadaltë për të arritur në 17% vitin e ardhshëm.

Një situatë e ngjashme është parë edhe në vendet e rajonit. Por në krahasim me Shqipërinë, numri i të varfërve në raport me popullsinë është më i ulët. Standard më të mirë në këtë raport paraqet Serbia.

Të dhënat janë llogaritur nga Banka Botërore, e cila raporton se 405 mijë persona dolën nga varfëria në 5 shtete, prej të cilëve më shumë se gjysma e tyre ishin në Shqipëri.

Në skenarin e këtij viti, institucioni thotë norma e varfërisë për Ballkanin Perëndimor do bjerë me rreth 1 pikë përqindje në 13.8 për qind, por rritja e çmimeve të ushqimeve dhe energjisë mund të ndryshojnë këtë raport.

LEXONI GJITHASHTU:

• Mbi 263 milionë njerëz drejt varfërisë ekstreme, sipas raportit
• Tabaku: Kongresi i PS spektakël propagande përballë varfërimit të shqiptarëve