Ndihmë falas 300 fëmijëve në 13 qendra komunitare me investim të UNDP

Ky është Reni. Ai është 6 vjeç dhe është një nga rastet e suksesit të qendrës komunitare të ngritur në bashkinë Dimal që prej vitit 2019 me financim nga UNDP.

Kur ai shkoi për herë të parë në qendër nuk fliste dhe nuk i përgjigjej emrit të tij, por sot përparimi është i dukshëm.

Por raste si Reni ka shumë në të 13 qendrat e ngritura me financimin e UNDP, ku 300 fëmijë marrin trajtim falas.

Këto qendra janë një sinjal shprese për prindërit e tyre.

“Jo vetëm ne, por edhe me sa kam biseduar unë me prindër të tjerë dhe me gjyshër, edhe në aktivitete të ndryshme janë të gjithë të kënaqur”, thotë gjyshja e një fëmije në Përmet.

Edhe pse këto qendra plotësojnë të gjitha kushtet infrastrukturore të nevojshme për trajtimin e problematikave të ndryshme të këtyre fëmijëve, mungesa e specialistëve është problem në qytete të vogla si Përmeti.

“Vështirësia është jashtëzakonisht e madhe për burime njerëzore, nuk jemi as në Tiranë as në Durrës, pjesa më e madhe e të rinjve të specializuar nuk kthehen”, thotë nënkryetarja e Bashkisë Përmet, Aulona Meshini.

Me mbështetjen e qeverisë zvicerane, programi “Askush të mos mbetet pas”, ka në fokus jo vetëm ngritjen e qendrave, por edhe trajnimin e specialisteve që kujdesen për fëmijët.

Përveç fëmijëve në këto qendra komunitare punohet edhe me prindërit për t’i ndërgjegjësuar që të mos neglizhojnë trajtimin e fëmijëve të tyre që në hapat e para kur konstatojnë diçka ndryshe.

LEXONI GJITHASHTU:

• Merr zgjidhje problemi i fëmijës autik, Erioni nis terapinë