Verçani: Asnjë tifoz izraelit nuk do udhëtojë në Shqipëri për të parë ndeshjen

Sonte në mbrëmje, Shqipëria do të përballet me Izraelin në stadiumin “Air Albania” për kompeticionin Liga e Kombeve.

Drejtori i Departamentit të Komunikimit në FSHF, Andi Verçani tha për emisionin “Sot” në “Euronews Albania”, se nuk do të ketë tifozë izraelitë të cilët do të udhëtojnë nga Izraeli në Shqipëri, për të parë ndeshjen.

“Për fat të keq nuk ka asnjë tifoz udhëtues në këtë ndeshje. Janë 150 bileta të cilat i takojnë Federatës së Izraelit të dhëna nga Federata Shqiptare si organizatore dhe këto bileta i kanë shpërndarë për miqtë e tyre përmes ambasadës izraelite”, tha ai.

Verçani nënvizoi se deri në orët e pasdites janë shitur 16,500 bileta dhe janë në dispozicion edhe 5,500 për tifozët.

Biletat, tifozët mund t’i gjejnë deri në 20:30 pranë stadiumit “Selman Stërmasi”, ndërsa biletaria te “Air Albania” do të mbyllet për shkaqe sigurie, para fillimit të ndeshjes.

Verçani bëri me dije se sipas rregullores, futja e tifozëve në stadium do të fillojë 2 orë para ndeshjes, pra në 18:45.

Shqipëria është përballur katër herë me Izraelin, ku kemi regjistruar dy fitore dhe dy humbje.

LEXONI GJITHASHTU

• Sonte luhet Shqipëri-Izrael, trajneri Reja i beson sulmin Brojës dhe Uzunit