Parku i Butrintit nuk mund të administrohet nga OJF-të, thotë Meta

Presidenti i Republikës, Ilir Meta thotë se Parku i Butrintit nuk mund të administrohet nga organizma shoqërorë, të tilla si OJF-të.

Në një deklaratë për mediat nga Presidenca, Meta u shpreh se sipas Konventës së Trashëgimisë Botërore të Parisit, të cilën Shqipëria e ka nënshkruar, përgjegjësia e ruajtjes dhe administrimit të pasurive i takon shtetit.

“Sipas Konventës së Trashëgimisë Botërore të Parisit, përgjegjësia e ruajtjes dhe administrimit të pasurive që përbëjnë trashëgimi kulturore universale, nuk mund të kalojë kurrsesi në një organizëm shoqëror siç janë OJF-të.

Por, ajo ngelet përgjegjësi e shtetit që ka nënshkruar konventën. Në asnjë rast nuk parashikohet që këto fondacione të kenë të drejta administrimi, me të gjitha tagrat të një pasurie të paluajtshme me vlerë të tillë si Parku Kombëtar i Butrintit, siç synohet t’i jepet sipas marrëveshjes së propozuar”, theksoi Kreu i Shtetit.

Ditën e djeshme, Meta riktheu për rishqyrtim në Kuvend, marrëveshjen për administrimin e Parkut të Butrintit.

Ndërsa, pak ditë më parë, Kuvendi miratoi me 75 vota pro, ligjin për administrimin e Parkut të Butrintit nga Fondacioni shqiptaro-amerikan për Zhvillim për 10 vitet e ardhshme.

Edhe grupime të shoqërisë civile e kanë kundërshtuar kalimin e Parkut të Butrintit në menaxhim të Fondacionit shqiptaro-amerikan për Zhvillim.

LEXONI GJITHASHTU

• Meta kthen për rishqyrtim në Kuvend, marrëveshjen për administrimin e Butrintit
• Margariti replikon me Zhupën: Nuk do të ketë tjerësim të pronës në Butrint
• Parlamenti miraton ligjin për menaxhimin e Butrintit