OKB akuzon Shqipërinë: Armë Kongos duke shkelur normat ndërkombëtare

Kombet e Bashkuara kanë akuzuar Shqipërinë, por edhe vende të tjera, se kanë dërguar armatime në Republikën Demokratike të Kongos.

Ndonëse vendi afrikan nuk është subjekt i sanksioneve dhe embargove, dërgimi i armëve duhet të bëhet duke njoftuar OKB-në, gjë që është anashkaluar nga vendi ynë dhe shtete të tjera si Rumania, Turqia, Afrika e Jugut, Izraeli, Kina, Irani, etj.

Raporti i Kombeve të Bashkuara është konfidencial, por u sigurua nga agjencia e lajmeve “AFP” këtë javë.

“Disa nga këto armatime, të destinuara për ushtrinë vendase, kanë përfunduar më pas në duart e grupeve të armatosura”, thuhet në raportin e OKB-së.

Pjesa lindore e Republikës Demokratike të Kongos është një nga zonat më të nxehta të vendit, e përfshirë nga dhuna e milicive që në vetëm pak muaj ka marrë mbi 1 mijë jetë dhe ka detyruar mbi gjysmë milionë banorë të braktisin shtëpitë e tyre.