Të lejohet rivlerësimi i testit, MAS kërkon ndryshime në Maturën Shtetërore

Maturantët që do të kenë ankesa ndaj notës së marrë në provimet e Maturës Shtetërore mund të kërkojnë rivlerësim të testit, duke nisur nga viti i ardhshëm.

Ky është një nga propozimet e ministres së Arsimit Evis Kushi në takimin që ajo ka zhvilluar me Komitetin e Maturës Shtetërore, mësues dhe drejtues të institucioneve arsimore.

“Ne nuk jemi të pagabueshëm, sepse kur themi që nuk ka rivlerësim të testit kjo nënkupton që ne jemi të pagabueshëm. Nuk ka mësues të pagabueshëm, vlerësues të pagabueshëm. Ne propozojmë që ta rishikojmë këtë pikë”, – tha ministrja.

Një tjetër propozim ishte ai është që vitin e ardhshëm të pilotohet një testim elektronik i vëzhguar, për pranimin në programet universitare të studimit që janë shumë të kërkuara, siç është programi Mjekësi e Përgjithshme apo stomatologji. Kjo, sipas ministres me qëllim nxitjen e meritokracisë.

Gjithashtu, nga viti i ardhshëm do të nisë për rankimin e gjimnazeve sipas cilësisë përmes një sistemi për të vlerësuar së pari gjimnazet, më pas edhe shkollat 9-vjeçare.

LEXONI GJITHASHTU:

• Provimi i Biologjisë kishte pyetje olimpiade, pretendon maturanti
• Maturantët në protestë, kundërshtojnë mënyrën e hartimit të tezave të provimeve