E shkarkoi sot, postet me rëndësi që Rama i besoi Ahmetajt në 9 vite

Nga 2013-ta, Arben Ahmetaj ka qenë përherë në krahë të Edi Ramës.

Në 9 vite drejtimi të qeverisë nga Rama, Arben Ahmetaj ka qenë gjithmonë pjesë e kabineteve qeveritare, me përjashtim të një 10-mujori nga janari deri në dhjetor të 2019-ës.

Fillimisht Ahmetaj ishte pjesë e qeverisë Rama 1 si ministër i Zhvillimit Ekonomik, Turizmit, Tregtisë dhe Sipërmarrjes. Këtë detyrë e mbajti nga shtatori i 2013-ës deri në shkurt 2016-të.

Për rreth 1 vit Arben Ahmetaj do të shërbente si ministër i Financave. Në qeverinë Rama 2, Ahmetaj do të drejtonte ministrinë e Financave dhe Ekonomisë. Në shkurt 2019 do të vinte largimi i parë i tij nga qeveria. Qëndrimi larg kabinetit qeveritar do të zgjaste vetëm 10 muaj, kohë në të cilën Ahmetaj do të drejtonte Komisionin e Ekonomisë.

Por në dhjetor të 2019-ës, pas 2 tërmeteve të forta që kishin lëkundur vendin në shtator dhe nëntor, Arben Ahmetaj u emërua si ministër shteti që do të kujdesej për procesin e Rindërtimit. Këtij posti në shtatorin e vitit të shkuar do I bashkëngjiste edhe pozicionin e zv.kryeministrit pas zgjedhjeve te 2021

Arben Ahmetaj është deputet i Partisë Socialiste që prej vitit 2009, ku fillimisht u zgjodh në qarkun e Korçës, dhe më pas në Gjirokastër e Tiranë. Në karrierën e hershme, Arben Ahmetaj ka shërbyer në administratë si drejtor i tatimeve, por edhe si zv.ministër i Integrimit.

Në këto 9 vite të maxhorancës socialiste, Arben Ahmetaj ka qenë një nga figurat më të sulmuara. Së fundi ai është një nga ministrat ndaj të cilit opozita ka dorëzuar padi për çështjen e inceneratorëve.

LEXONI GJITHASHTU:

• Të enjten socialistët festime në shesh për hapjen e negociatave
• Bashkëpunëtore e Ramës prej vitesh, kush është kryenegociatorja Dhuka
• Shkarkohet Arben Ahmetaj, Belinda Balluku emërohet zv.kryeministre