Kryeministri spanjoll sot dhe nesër në Beograd, pritet të vizitojë edhe Tiranën

Këtë premte, kryeministri spanjoll Pedro Sanchez nis vizitën katërditore në vendet e Ballkanit Perëndimor dhe sot dhe nesër, do të jetë në Beograd.

Në ditët në vijim, Sanchez do të vizitojë edhe Sarajevën, Mostarin, Podgoricën, Shkupin dhe Tiranën dhe një nga çështjet që do të jetë në fokus është sigurisht zgjerimi i Bashkimit Evropian. Në turin e tij ballkanit, kryeministri spanjoll shmangu Kosovën.

Gjatë takimit të liderëve të BE-së në Bruksel në fund të qershorit, Sanchez vendosi të “riaktivizojë, ringjallë dhe rigjallërojë procesin e zgjerimit” për vendet e Ballkanit Perëndimor.

Kjo do të jetë vizita e parë e një kryeministri spanjoll në Serbi pas disa dekadash. Ardhja e tij në Beograd, thonë analistët, është shumë domethënëse, para së gjithash sepse në planin dypalësh ka pasur një farë qetësie dhe përveç çështjes së zgjerimit, është e sigurtë se do të diskutohet edhe për blerjen e dy avionëve transportues ushtarakë Airbus.

Në kryeqytetin e Serbisë, palët pritet të disktuojnë edhe për çështjen e dialogut mes Beogradit dhe Prishtinës.

Kujtojmë se Spanja është një nga pesë vendet anëtare të Bashkimit Evropian që nuk e njeh Kosovën si shtet të pavarur.

LEXONI GJITHASHTU:

• Kryeministri i Spanjës nis turneun në Ballkan, por shmang Kosovën