Tragjedia në Himarë, Nano: Policia nuk është informuar nga institucionet përkatëse

Drejtori i Përgjithshëm i Policisë së Shtetit, Gledis Nano ka kërkuar bashkëpunim mes institucioneve të Prefekturave, Bashkive dhe të Agjencisë Kombëtare të Bregdetit.

Me anë të një shkrese drejtuar ditën e sotme institucioneve përkatëse, Nano kërkon angazhim të të gjitha hallkave për të monitoruar dhe kontrolluar zbatimin e ligjit në fushën e turizmit.

Sipas tij, Policia e Shtetit nuk është informuar periodikisht mbi masat e marra nga institucionet përkatëse, të cilat lejojnë licensimin për zhvillimin e aktiviteteve detare, apo pajisjen me leje drejtimi të mjeteve motorike lundruese.

Ndër të tjera, në shkresë thuhet se siguria në dete dhe plazhe është prioritet i veprimtarisë së intitucioneve shqiptare, ndaj dhe Nano kërkon ndihmën e tyre, pasi Policia e Shtetit nuk mund ta garantojë këtë e vetme nëse nuk ka bashkëpunim.

Nano shkarkoi të gjithë zinxhirin drejtues të Policisë Kufitare të Vlorës pas ngjarjes tragjike në Himarë, ku një 7-vjeçare u përplas për vdekje nga një skaf.

Drejtuesi i skafit, ishte Arjan Tase, efektiv policie i cili u përjashtua nga Nano.

Këtë të premte, Gjykata e Vlorës ka dhënë masën e sigurisë arrest me burg për Tasen dhe akuza që është ngritur mbi të  është ajo e vrasjes me dashje indirekte.

LEXONI GJITHASHTU

• Vrasje me dashje indirekte, Gjykata lë në burg ish-efektivin Arjan Tase
• Berisha: Janë zhdukur kamerat që regjistruan vrasjen në Himarë
• Ngjarja në Himarë, Ngjela: Vrasje me dashje, të ashpërsohet kodi penal