Partitë shqiptare në RMV kundër BDI së Ali Ahmetit: Na vodhi votat

Zeqirija Ibrahimi, Deputet i partisë “Alternativa” në Maqedoninë e Veriut tha për Euroneëws Albania se partia që ai përfaqëson ka dyshime të mëdha se ka pasur abuzime në procesin zgjedhor, që nga mënyra se si janë mbledhur ato votat, llogaritja dhe shpallja e rezultatit nga Komision i Zgjedhjeve e deri tek vendimet e Gjykatës Administrative.

Sipas tij, partia BDI e Ali Ahmetit ka manipuluar rezultatin e zgjedhjeve duke nëpërkëmbur vullnetin e votuesve shqiptarë .

“Ne në këtë rast aludojmë tek BDI që ka pasur anëtarë të komisioneve zgjedhore dhe si parti ka qenë në konkurrencë me ne për të fituar zgjedhjet. Edhe pse sondazhet na nxirrnin fitues absolut, për shkak të manipulimeve zgjedhore ne dolëm minus 3 deputetë.

Në të vërtetë nuk kemi ndonjë shpresë ta zgjidhim këtë gjë përmes rrugëve juridike, duke qenë se BDI ka ndikim në komisionin e zgjedhjeve dhe në gjykatë dhe ata detyrimisht na kanë shtyrë që përmes  aksioneve publike qytetare të shfaqim pakënaqësinë tonë dhe të kërkojmë prej faktorit ndërkombëtar të vendosë standarde të tjera që të pamundësohen forma të tilla abuzimi me vullnetin e lirë të qytetarëve”, tha ai.

Z. Ibrahimi nuk e përjashtoi mundësinë e një koalicioni me LSDM e Zoran Zaev për të qenë pjesë e qeverisjes së vendit.