Frikë nga shpërthimi i gazit, prindërit druhen për fëmijët: Të mbyllet shkolla

Të frikësuar për sigurinë e jetës dhe të ardhmen e fëmijëve të tyre, disa banorë të Porto Romanos u takuan sot me drejtorin e shkollës 9-vjeçare ‘Met Hasa’ duke i kërkuar këtij të fundit pezullimin e mësimit dhe largimin e menjëhershëm të fëmijëve nga shkolla.

Shkak u bë rrjedhja e gazit 3 ditë më parë në fabrikën pak metra larg shkollës.

Ata i frikësohen një shpërthimi a rrjedhjeje tjetër, që mund t’u rrezikojë jetën 700 nxënësve.

“Ne kërkuam që të pezullohet mësimi derisa t’i jepet një zgjidhje kësaj, për të vetmen arsye se këtu është një bombë atomike e mirëfilltë. Imagjino, një bombël në shtëpi me 16 kg të shkatërron shtëpinë po shpërtheu. Llogarite sa shkon me 15.000 tonë”, thotë një banor i zonës.

Por kush fshihet pas kësaj firme, për zhvendosjen e së cilës larg banesave e shkollës nuk mjaftuan as 4 shpërthime në 2 vite?

Firma rezulton të jetë regjistruar fillimisht me emrin “Alba Cosmetics” për ta ndërruar më pas atë në “Gas Power Al”.

Për banorët ky është “maskim”.

“Është bërë me mashtrim. Këtu fillimisht u vendos një fabrikë lëkure, që e largoi komuniteti. Pastaj e modifikuan siç e kanë zakon këta dhe thanë që do të bënin parfumeri. Pastaj në këtë maskë kanë filluar të bënin montimin e bombulave që të furnizojnë Turqinë”, shprehet një banor.

Por çfarë thotë ligji përpara “fuqisë së gazit”?

Ligji flet qartë sa i takon kushteve të lejes për pajisjet nën presion dhe çfarë ndodh kur i licencuari rrezikon jetën, shëndetin dhe pasurinë e qytetarëve.

E ndërsa kjo ndodh vazhdimisht, ky subjekt vijon i patrazuar biznesin duke mbajtur nën alarm mbi 7000 banorë të zonës përreth.

LEXONI GJITHASHTU:

• Rrjedh gazi nga cisterna e Porto Romanos, banorët: Janë helmuar 3 fëmijë
• Rrjedhje gazi nga cisternat në Porto Romano, banori: Kemi frikë, minë me sahat