Biznesi bëhet më pesimist se qytetari, çmimet ndikojnë në aktivitet

Bizneset janë pesimistë për situatën ekonomike. Ndryshe nga ta, qytetarët janë më besimplotë. Ky është konkluzioni për muajin tetor i nxjerrë nga Banka e Shqipërisë.

Besimi në ekonomi po bie. Këtë tregojnë të dhënat e fundit të Bankës së Shqipërisë nga anketat me bizneset dhe konsumatorët, ku në muajin tetor, Treguesi i Ndjesisë Ekonomike u ul me 2 pikë, i dyti muaji radhazi me tendencë rënëse.

Ndërtimi është sektori që reflektoi uljen më të madhe të besimit, nisur nga ngadalësimi i aktivitetit dhe kontratat më të ulëta porositëse, edhe pse pret një rritje të çmimeve në vijim.

Në rënie të fortë besimi është edhe industria. Ky sektor pret rritje të prodhimit dhe punësimit në të ardhmen, por sot për sot, kontratat dhe çmimet e kanë bërë pesimiste gjendjen.

Edhe tregtia e shërbimet nuk presin ritme pozitive në situatë afatshkurtër, nisur edhe nga parashikimet për inflacionin dhe rezervimet që kanë bërë.

Nga ana tjetër, qytetarët duket të jenë më optimistë se biznesi. Pritshmëritë e tyre për përmirësimin e gjendjes së tyre financiare dhe gatishmëria për të bërë blerje të mëdha, janë faktorët e vetëm që balancojnë situatën e përkeqësuar ekonomike.

LEXONI GJITHASHTU:

• Inflacioni, qytetarët parashikojnë ulje më shpejt se bizneset e bankat
• Dështon protesta e biznesit të vogël, shoqata bëri thirrje për ulje qepenash
• Biznesi: Të rikthehet rimbursimi i TVSH në bujqësi