Kosova kopjon modelin e Shqipërisë, gjyqtarët dhe prokurorët pritet të kalojnë në veting

Shqipëria do të asistojë Kosovën në reformën në drejtësi që pritet të nisë atje. Ekspertë nga Tirana do asistojnë ata në Kosovë mbi procesin e vetingut që pritet të fillojë për gjyqtarët dhe prokurorët. Lajmi është bëri i ditur nga dy ministrat e Drejtësisë së Shqipërisë dhe Kosovës gjatë një takimi që ata zhvilluan në Tiranë.

Ministrja Etilda Gjonaj u shpreh se qëllimi parësor në këtë proces është ndihma ndaj Kosovës.

“Ramë dakord, që të kemi bashkëpunim pikërisht në këtë prioritet të ri që Ministria e Drejtësisë së Kosovës ka ndërmarrë lidhur me reformimin e sistemit të drejtësisë. Pa dyshim, ekspertiza shqiptare, eksperienca jonë, mësimet e mësuara gjatë kësaj periudhe do të shërbejnë edhe për reformimin që ministria e drejtësisë së Kosovës do marrë në vijim”, tha Gjonaj.

Ministri i Drejtësisë në Kosovë, Selim Selimi sqaroi se në takim u diskutuan praktikat për një sistem llogaridhënës për njerëzit e drejtësisë në Kosovë.

 “U pajtuam me ministren që të intensifikojmë bashkëpunimin e reformave në drejtësi kundrejt integrimit evropian. Shqipëria ka bërë hapa konkretë në këtë rrugë dhe në këto hapa Kosova do të reflektojë mësimet më të mira”, tha minsitri.

Forcimi i bashkëpunimit juridik mes dy vendeve pritet të jetë një ndër prioritetet e dy qeverive dhe do të ketë nënshkrim të disa marrëveshjeve.