Zvarritet sërish gjyqi për statutin e PD, avokati i Alibeajt kërkoi më shumë kohë

Edhe këtë të martë nuk pati vendim për statutet e Partisë Demokratike që kanë dalë nga kuvendet e 17 korrikut 2021 dhe 18 dhjetorit.

Gjykata e Apelit Tiranë e shtyu vendimmarrjen për ankimin e Enkelejd Alibeajt, i cili ka kërkuar që vendimet e këtyre dy kuvendeve të regjistrohen bashkë.

Kjo është shtyrja e katërt, pas atyre që më herët gjykata ka bërë më 3 e 10 nëntor si dhe më 6 dhjetor. Shkaku i shtyrjes këtë herë ishte kërkesa e avokatit Rezart Kthupi për më shumë kohë që të njihet me dosjet. Seanca e radhës është caktuar më 22 dhjetor.

Shqyrtimi i kësaj çështje në Gjykatën e Apelit edhe në rast vendimmarrje nuk do të zgjidhte asgjë në mënyrë përfundimtare sa i takon statutit të Partisë Demokratike që njihet ligjërisht.

Në rastin më të mirë për palën e Enkelejd Alibeajt, nëse gjykata do e pranoj kërkesën, atëherë çështja do të rikthehej në shkallën e parë të gjyqësorit.

Në këtë shkallë të gjyqësorit ka edhe një vendim dhënë nga gjyqtari, Agron Zhukri i cili ka njohur statutin e dalë nga Kuvendi që thirri Sali Berisha më 11 dhjetor 2021. Por edhe vendimi i Zhukrit është apeluar nga Alibeaj që kërkon rrëzimin e tij.

Për këtë çështje ende nuk ka një datë shqyrtimi nga Gjykata e Apelit. Nëse Apeli do të pranonte kërkesën e Alibeajt, do i hapej rruga e mbetjes në fuqi të vendimeve që kanë dalë nga kuvendi 18 dhjetorit.

Por nëse Gjykata rrëzon ankimin e Enkelejd Alibeajt, atëherë Berishës do i lindte e drejta për ta regjistruar statutin e 11 dhjetorit në regjistrin kombëtar të partive, duke mbajtur në mënyrë definitive vulën dhe firmën e PD-së edhe zyrtarisht.

LEXONI GJITHASHTU:

• Vendimi për statutin e PD, më 6 dhjetor gjykata vendos për ankimin e Alibeajt
• Basha përgatit rikthimin, deputetët ‘presion’ gjykatës për statutin