Dritan Abazoviç: Raport miqësor me Ramën e Kurtin, Kosova t’i bashkohet Open Balkan

Kryeministri në detyrë i Malit të Zi, Dritan Abazoviç deklaroi se ka një raport shumë të mirë dhe miqësor me homolgët e tij, kreun e qeverisë së Shqipërisë, Edi Rama dhe atë të Kosovës, Albin Kurti.

Në një intervistë ekskluzive për Euronews Albania, Abazoviç u shpreh se bashkëpunimi i Malit të Zi me Shqipërinë ka arritur në një nivel shumë të lartë dhe shtoi se kjo duhet të shërbejë si model për shtetet e tjera të rajonit.

Sipas tij, nisma rajonale Open Balkan është mjaft e rëndësishme dhe çdo shtet i rajonit, përfshirë Kosovën, duhet të jetë pjesë e saj, në mënyrë që të dialogohet.

“Me Ramën dhe me Kurtin, bashkëpunimi shkon shumë mirë. Me Ramën, e kemi çuar në një nivel që mendoj se, çdo herë kryeministrat e Shqipërisë dhe Malit të Zi duhet të kenë raporte të tilla, raporti është në nivel shumë të lartë. Sa i takon zotit Kurti, kemi një raport shumë të mirë, miqësor. Shpresoj se shumë shpejt do të organizojmë vizita zyrtare, qoftë me ardhjen e zotit kurti në Podgoricë, qoftë me vizitën tonë në Prishtinë.

Dera, dritarja dhe dora e shtrirë e Malit të Zi do të jetë për çdo shtet në rajon dhe ideja jonë është që vetëm në bashkëpunim me të gjithë shtetet e Ballkanit Perëndimor, duhet të krijojmë marrëdhënie shumë të mira. Mendoj se me Shqipërinë, këtë nivel që kemi arritur, mundet të jetë modeli se si duhet të bashkëpunojmë edhe me shtetet e tjera në rajon”, theksoi ai.

LEXONI GJITHASHTU

• Kriza në Malin e Zi, Abazoviç për Euronews: Ka konfuzion, por do zgjidhet
• Abazoviç zbulon mesazhin e librit “Kritika e etikës globale”
• “Dritan, nuk je vetëm”- Rama merr pjesë në prezantimin e librit të Abazoviçit