Beteja për komisionerët: Berisha dorëzon kërkesën, Alibeaj afat deri më 29 janar

Përballja në Partinë Demokratike, ashtu siç pritej tashmë është transferuar në Komisionin Qendror të Zgjedhjeve.

Këtë të premte, Partia Demokratike e drejtuar nga Sali Berisha dorëzoi në KQZ listën me komisionerët e KZAZ-ve për zgjedhjet e 14 majit. Kjo lëvizje e Berishës vjen në një kohë, kur KQZ deri më tani ka njohur si përfaqësues të Partisë Demokratike palën e Alibeajt.

Ishte Komisioneri Celibashi, i cili në një deklaratë për mediet gjatë javës së shkuar theksoi se ai do të njohë si përfaqësues të PD-së vetëm atë që do të njohë Gjykata.

Sakaq, nga ana tjetër pala e Alibeajt nuk i ka dorëzuar listat e saj me komisionerët e KZAZ-ve. Në të njëjtën fazë është edhe Partia Socialiste. Sipas vendimit të KQZ-së, afati final për dorëzimin e listave me emrat e anëtarëve të KZAZ-ve është data 29 janar.

Sipas shortit të hedhur në KQZ komisionet Zonale të Administrimit Zgjedhor me numër çift do t’i drejtojë Partia Socialiste, dhe ato me numër tek Partia Demokratike. Ndërkohë anëtarët e KZAZ-ve do të ndahen 2 PS, 2 PD, 1 PSD dhe 1 anëtar nga Partia e Lirisë.

LEXONI GJITHASHTU:

• Përplasja në PD më 8 janar, Spartak Braho: Pse ishte planifikuar vrasja e Alibeajt
• “Rama i përfshirë në aferë të zezë”, Berisha mbledh deputetët e PD-së