“Mua dhe Berishën nuk na blen dot!” Meta ashpërson tonet ndaj kryeministrit

Kreu i Partisë së Lirisë, Ilir Meta mblodhi të shtunën komitetin drejtues prej nga akuzoi kryeministrin Edi Rama si aleat të krimit.

Teksa iu referua skandalit McGonigal, Meta u shpreh se Rama ka frikë nga llogaridhënia ndaj nuk lejon ngritjen e Komisonit hetimor për këtë cështje.

“Ka pranuar të fshihet pas fustanit të grave, por nëse SHBA është ngritur në këmbë për një drejtor të papërgjegjshëm e bën komision hetimor në Kongres e Senat e kudo, pa asnjë diskutim do ketë Komision Hetimor. Meqë je i pastër dhe i ndershëm pse ke frikë? A e mbani mend kur Ulsiu e thërriste presidentin, pra mua në Komision. Më thoshin këshilltarët, nuk do shkosh se je president, ata janë të paligjshëm. Unë të mos shkoj atje? Po shqiptarët që më thonë, nëse është i pastër pse s’shkon”, tha Meta.

Teksa paralajmëroi Ramën për humbje në zgjedhjet e 14 majit, me tonet të larta, Meta tha se kryeministri mund të ketë të ardhura për të korruptuar gjithkënd, por se atë dhe Sali Berisha nuk mund t’i blejë dot.

“Mund të ketë lekë sa të dojë por Ilir Metën e Sali Berishën nuk i blen dot. I bëj thirrje socialistëve ta largojnë sa më shpejt që të mos përfundojë si Pasoku. Asgjë nuk do ta shpëtojë nga ndëshkimi”, tha Meta.

LEXONI GJITHASHTU:

• Kreshnik Spahiu: Meta shpreson të trashëgojë PD-në, pasi të vdesë Berisha
• Meta ndan foton me Ibrahim Rugovën: Gëzuar Pavarësinë Kosovë e dashur