Kërcënohet me jetë deputeti shqiptar në Serbi

Deputeti shqiptar në Parlamentin e Serbisë, Shaip Kamberi është kërcënuar me jetë.

Kamberi bëri të ditur se personi që e ka kërcënuar përmes rrjetit social, Facebook është Danijel Milkoviç.

“Mjaft me rrëmbime, ndërsa sa të përket ty personalisht,  ruaje gjithmonë shpinën kur të shkosh dikund. Nuk do të kuptosh asnjëherë kur do të vij për kokën tënde” ishin fjalët kërcënuese ndaj deputetit shqiptar.

Sipas Kamberit, në Serbi ka një klimë anti-shqiptare.

“Për muaj me radhë, Serbia po mundohet për të ndërtuar një realitet virtual të gjoja rrezikimit të jetës së Serbëve në Kosovë. Ndërkohë, sa është e rrezikuar liria dhe jeta e shqiptarëve në Serbi flasin rastet e shumta të diskriminimit. Dënimi i para disa ditëve i kryetarit të Këshillit Kombëtar, Ragmi Mustafi, për përdorimin e flamurit kombëtar shqiptar me 28 nëntor të vitit të kaluar, paraqet vetëm një nga rastet e këtilla. Ndërkohë, sot, përmes rrjetit social Facebook, nga një person i panjohur kam pranuar kërcënime të drejtpërdrejat për jetën time.

„Mjaft me rrëmbime, ndërsa sa të përket ty personalisht,  ruaje gjithmonë shpinën kur të shkosh dikund. Nuk do të kuptosh asnjëherë kur do të vij për kokën tënde“ është teksti i mesazhit që kam marrë, përmes mesenger,  nga përsoni Danijell Millkoviq. Kjo është atmosfera në të cilën punojnë, veprojnë dhe jetojnë shqiptarët, në Serbinë autoritare të Aleksandar Vuçiqit.  Kjo klimë antishqiptare, për vite me radhë po stimulohet nga mediat proqeveriatare dhe deklaratat e shpeshta  fyese të qeveritarëve serb. Kjo atmosferë diskriminuese e kërcënuese është arsyeja kryesore e kërkesës tonë për zgjidhje simetrike të të drejtave të komuniteteve. Puna jonë vazhdon, ajo nuk do të ndalet, as për shkak të kërcënimeve apstrakte e as atyre konkrete që mund të vijnë. Të vërtetën do ta themi, pavarësisht se të tjerëve nuk i pëlqen”, shkroi Kamberi.

LEXONI GJITHASHTU

• “Asociacioni është detyrim”- Analisti: Po përballemi më kot me ndërkombëtarët
• Takimi me Kurtin, Vuçiç: Në Bruksel do t’i përmbahemi vijave të kuqe për Kosovën
• A do të arrijnë një marrëveshje Kurti dhe Vuçiç? Flet ish-ministri i Jashtëm