Çelet ekspozita në Çarshi të Shkupit në Ditën Botërore të Artit

Dita botërore e artit në Maqedoninë e Veriut rikthen lavdinë e Çarshisë së Shkupit. Kjo zonë do të jetë një gërshetim i artit që do të prezantohet para dyqaneve të vjetra të zanateve në zhdukje.

Artistët e rinj të Maqedonisë së Veriut prezantuan vepra unike që kanë të bëjnë me zanatet e vjetra.

“Në ato qëndisje është kalldrëmi e Çarshisë ndërsa fytyrat paraqesin njerëzit nëpër Çarshi në mënyrë abstrakte,” – u shpreh artistja Gabriella Zhivkovska.

Shumë zanate të lavdishme dikur si ngjyrosja me bojë, apo ndreqja e orëve dhe bërja e kapeleve me dorë, tani janë thuajse relike.

“Momentalisht kemi mbetur vetëm tre vetë në Çarshi. Në kohën e Jugosllavisë për shembull në vitin 1983 kur e hapa dyqanin kemi qenë 50 sahatçinj vetëm në Shkup ndërsa tani kemi mbetur vetëm 12,” – tha zejtari Fadil Idrizi.

Ekrem Neziri po mban gjallë biznesin 120-vjeçar të familjes së tij për ngjyrosur me metoda të vjetra, ndërsa shpreson t’ja kalojë biznesin djalit të tij.

“Këtë zanat e kemi trashëgim prej familjes. E duam, punojmë nga pak. Nuk është puna siç ka qenë më herët por po punojmë nga pak,” – tha zejtari.

Zejtari Neziri i dhuroi ambasadorit të Bashkimit Evropian në Shkup, David Geer një palë çorape tradicionale shqiptare si për ti kujtuar vlerat e Çarshisë dhe Maqedonisë së Veriut.

Ambasadori kujtoi se vlera e artit dhe zanateve të Çarshisë janë një vlerë që duhet kultivuar.

“Arti, përveç reflektimit të jetëve tona, komunikimit dhe kreativitetit, është edhe kontribuues i ekonomisë, prandaj BE mbështetë artin dhe krijimin e potencialit të njerëzve të rinj këtu,” – u shpreh ambasadori i BE-së në Shkup, David Geer.

Ekspozita e hapur me vepra artistike që lidhen me zanatet në zhdukje të Çarshisë do të qëndrojë e hapur për një javë.

LEXONI GJITHASHTU:

• Ekspozita me veprat e Gjelosh Gjokaj, 73 piktura që nga viti 1961
• Ekspozita ‘100 vjet Flamurtar’ çelet në Vlorë me rastin e përvjetorit të klubit